Cuant che il tiessût al è une art

Dal 1987, la associazion Le Arti Tessili di Manià e je impegnade te promozion de culture dai tiessûts, curant la galarie di art tessil “Gina Morandini” screade tal 2022, e inmaneant un concors internazionâl dedicât ae stesse art, par zovins sot dai 35 agns di dut il mont. Un riferiment pe “Fiber Art” internazionâl, che e va des tecnichis tradizionâls par rivâ ae inovazion, intune celebrazion de creativitât e dal incuintri jenfri culturis diferentis. Il “Premio Valcellina Award”, un puint jenfri passât e presint, al è rivât ae decime seconde edizion, celebrant i trente agns di ativitât a pro de art tessil e chest an al veve sielt il teme par inglês “Wake up!” (Sveâsi!), uns sburte a cjapâ cussience e posizion devant aes disfidis dal mont di vuê. La jurie e à za dât i premis (ai artiscj de Italie, Cine, Russie e France) e lis oparis a saran in mostre de Biblioteche di Pordenon fint ai 30 di Mai. Dongje di che, e je vierte simpri a Pordenon une mostre te sale esposizions de Savio in via Udine cu lis oparis de colezion dal premi e une a Manià cu lis oparis fatis tai laboratoris par ducj. (A.I.) – 20.05.2026