Domenie ai 2 di Otubar dal 2022 la Societât Filologjiche Furlane si da adun a Spilimberc pal so XCIX Congrès sociâl. Pal Sodalizi e je la cuarte volte inte “citât dal mosaic”, dopo dai congrès dal 1926, 1946 e 1984, che a àn traviersât no dome la storie de Filologjiche, ma dal Nûfcent furlan.
“Tal 1926 – al ricuarde il president Federico Vicario – o passàrin l’aghe pe prime volte, come ch’al disè cun braùre il president d’in chê volte, Pier Silverio Leicht; vincj agns dopo, che lis feridis de vuere a jerin ancjemò viertis, il moment al jere dominât dal dibatiment politic sul avignî dal Friûl; chel dal 1984 al è stât il congrès di Novella Cantarutti, ricercjadore di etnografie e grande vôs de poesie furlane dal Nûfcent. Avuê o sin braurôs di tornâ in cheste maraveose citât dal Friûl di soreli a mont, che par mil resons e je centrâl pe nestre storie e culture».
Chel di chest an al sarà ricuardât tant che il prin congrès che si davuelç finalmentri in maniere normâl dopo de epidemie covid-19, ma ancje – come che al motive il sindic Enrico Sarcinelli – parcè ch’al cole insiemi cul centenari de Scuele Mosaiciscj dal Friûl, un istitût di formazion di impuartance fondamentâl, che si podarà visitâ pe ocasion.
La zornade dal Congrès e tacarà aes 9 a buinore cu la messe par furlan tal Domo di Sante Marie Maiôr, ch’e sarà celebrade di pre Italico Gerometta e compagnade dai grops corâi Tomat di Spilimberc, San Marc di Pordenon e de Cjantorie dal Domo di Vençon. Aes 10 si cjatisi te place dal Domo, li che i sbandieradôrs e i tamburins di Spilimberc a daran il bon acet ai partecipants. Aes 10.30 tal Teatri Miotto a tacaran lis voris dal Congrès: dopo dal salût dai sorestants si fasarà la premiazion de VI edizion dal Premio “Chino Ermacora” – Scuele e marilenghe, il concors par progjets didatics sul Friûl risiervât aes nestris scuelis. Dopo a fevelaran Federico Lovison, cu la relazion “Spilimbergo. Secoli di bellezza in un’antica città del Friuli” e Angelo Bertani, che al presentarà la figure e la opare di doi grancj protagoniscj de art furlane tant che Italo Zannier e Nane Zavagno. Si larà indevant cu la presentazion dal numar unic “Spilimberc” rincurât di Gianni Colledani e Marco Salvadori, une monografie che in passe 600 pagjinis e met adun 76 contribûts di 68 autôrs – ricercjadôrs e studiôs locâi e regjonâi – che a resonin sui aspiets plui e mancul cognossûts dal teritori, dividûts in 7 sezions: ambient e nature, storie, art e architeture, economie e societât, int e associazions, lenghe, leterature e musiche. Par sierâ la zornade, gustâ in compagnie e visitis al centri storic cu la vuide in lenghe furlane e ae Scuele Mosaiciscj (daûr prenotazion li de segretarie de Filologjiche, tel. 0432 501598 int. 1 – info@filologicafriulana.it).
In colaborazion cul Comun di Spilimberc a son in program ancje diviersis manifestazions sul teritori: vinars ai 30 di Setembar aes 8 e mieze di sere a Palaç Tadea si fasaran lis premiazions de IX edizion dal concors leterari “Zâl par furlan”, patrocinât ancje de Filologjiche. Sabide al 1 di Otubar aes 6 e mieze sore sere, simpri in Palaç Tadea, al sarà il conciert “Melodie popolari friulane nella reinterpretazione d’autore e jazz”. Par finî, martars ai 4 di Otubar aes 8 e mieze di sere inte sede SOMSI di Taurian, il numar unic “Spilimberc” al sarà presentât a dute la comunitât. Par informazions, cialâ il sît www.filologicafriulana.it. (ADG) – 28.09.2022
