“Collega-Menti”: lis disfidis des citâts

Lis disfidis dal abitâ a son il teme de tierce edizion di “Collega-Menti”, la rassegne culturâl inmaneade de Universitât dal Friûl e promovude dal ex retôr Roberto Pinton cu la cure sientifiche di Barbara Gallavotti. Di vinars ai 3 e fint a domenie ai 5 di Otubar, al sarà fat un scandai su lis disfidis des citâts letis di ponts di viste diferents. Il teme al è larc e al permetarà di frontâ cetancj argoments: dinamichis sociâls, culturâls e ambientâls, architeture, sostignibilitât, la salût e il mangjâ. Ancje chest an il festival si fasarà soredut fûr dai spazis de universitât, par jentrâ in contat cu lis personis tai lûcs simbolics dal centri storic: Cjase Cavazzini, la sede de Fondazion Friuli, la Torate di Sante Marie…, ma si podarà fa ancje un zîr virtuâl dentri dal cine Odeon dai agns Trente, capî ce che al sucêt intun edifici cuant che al à un taramot e cetant altri, cun grancj esperts, di Luca Perri a Telmo Pievani, Paola Viganò… (A.I.) – 02.10.2025