Cjase Cavazzini: une mostre par fevelâ de crisi climatiche

Inondazions, sut, migrazions, cambiaments di paisaçs. Nol è plui puest pe neutralitât cuant che si fevele de crisi dal clime, che aromai e je presinte tai nestris paisaçs e inte vite di ogni dì. Chest al è il pont di partence par “Dall’evidenza all’immaginazione” (Des provis ae imagjinazion), la mostre che e scree la novesime edizion di “Mind The Gap” a Cjase Cavazzini di Udin, mudant numars, olmis e fenomens ambientâi intune narazion visive potente dal nestri presint. La gnove mostre, pensade e promovude di Altreforme, e sarà vierte a Cjase Cavazzini dai 27 di Fevrâr ai 24 di Mai. Curade di Lorenzo Lazzari, la esposizion e propon une riflession urgjente ator de crisi climatiche contemporanie, mostrant oparis di artiscj di innomine internazionâl. (A.I.) – 26.02.2026