Cjanive al cîr dissegnadôrs di satire pal gnûf concors

Par cirî di fâ tornâ la voie e la capacitât di ridi di noaltris, dai nestris vizis e de nestre vite di ogni dì, invidant ducj a cjapâsi une piçule polse cun lizerece, la associazion Pro Castello di Cjanive e propon la decime tierce edizion dal concors “Caneva ride!”, cjanive e rît, vierte ai dissegnadôrs di dut il Mont. Promovût cul jutori de associazion Màcheri e dal Comun di Cjan, il concors – viert a ducj i autôrs dai 16 agns – al è deventât vie pal timp un dai apontaments internazionâi plui impuartants pe satire dissegnade. Nassût in memorie di Toni Zampol, umorist e naratôr dal teritori, simpri svelt a cjatâ il lât comic di personis e situazions, tes edizions za fatis al à tirât dongje passe 2 mil autôrs di 360 nazions diferentis (!) cun plui di 4 mil oparis presentadis. Un grant sucès za tai numars pe sielte di une satire “di costum” che ogni an e cîr di ridi e fa ridi su un argoment diferent, ma che ducj a rivin a capî, di ogni bande. Si che duncje il teme de edizion 2026 al è “Si stave miôr cuant che si stave piês”: ven a stâi, di ce e parcè si lamentino? O ben: pardabon la vite e jere plui facile une volte? E l’avignî? E via indevant…