Cartulinis di Tramonç cui dissens des aganis

Di joibe ai 23 fint a sabide ai 25 di Mai e torne pe seconde edizion “Ciao da Tramonti”, une rassegne dedicade ae ilustrazion, che e viôt protagoniste dute la val Tramontine. Promovude e organizade de associazion Cemont e di Creazioni Indigeste, la iniziative e à burît fûr un concors nazionâl par dissegnadôrs sot dai 35 agns sul teme des aganis, intant che un grup di artiscj di innomine internazionâl al è stât incargât di ilustrâ cul propri segn cjantons, scurts e altris sogjets curiôs de valade. Chescj lavôrs si zontin a chei dai vincidôrs dal concors e aes oparis di cinc autôrs slovens e a saran in mostre ae Cjase de Cognossince fint ai 30 di Jugn. Ma a saran ancje racuelts intune elegante custodie gratuite, che e ten dentri ducj i dissens in cartuline. Il program al tache joibe ai 23 tal Municipi di Tramonç disore cu la cerimonie di premiazion: po dopo, a son programâts incuintris, spetacui e concierts fint a domenie. (A.I.) – 22.05.2024