Atualitât, leterature e ancje sport a “PordenonePensa”

A tacâ dal fin de setemane passade, il festival des ideis “PordenonePensa”, inmaneât dal circul culturâl Eureka, al va indevant cu la sô diesime otave edizion di incuintris in spazis vierts a ducj ator pe citât, fint ai 26 di Jugn. Il festival dal confront al cjape dentri seradis dedicadis ae atualitât, ae culture leterarie e ae art, ma no dome. Un event une vore biel al è previodût pai 19 di Jugn tal “Capitol” di Pordenon, dulà che Pietrangelo Buttafuoco e Giampiero Mughini a fasaran un omaç ai “Libris biei e la buine leture”. Ancje il sport al varà un pâr di moments di riflession fonde. Il spirt competitîf e la storie dal tenis a saran al centri dal incuintri di joibe ai 18 cun Adriano Panatta: l’ex campion de scuadre nazionâl, intervistât di Filippo Facci, al tornarà a contâ lis straordenariis vitoriis di chel an di no crodi, il 1976, e la tecniche che si doprave intun timp che nol torne plui. (A.I.) – 15.06.2026