Ator par Gurize ae scuvierte de storie de citât

“In\Visible Cities XL”, la gnove edizion slargjade dal Festival urban multimediâl inmaneade di Quarantasettazeroquattro in ocasion di GO!2025, e presente doi gnûfs apontaments a Gurize, là che al sarà pussibil esplorâ la citât e la sô storie sabide ai 26, tal dopomisdì, cul spetacul itinerant “Gorizia Memory Experience” de compagnie acquasumARTE, a pîts par lis stradis de citât, dentri de storie dal Nûfcent, dome cuntun pâr di scufis e un tablet o un telefonin. Domenie ai 27 il confront cu la azion di Franco Basaglia li dal ex ospedâl psichiatric, tal “Parc Basaglia”, cun “Esercizi di rivoluzione” (Esercizis di rivoluzion), une altre esperience multimediâl par rifleti su che al vûl dì passâ un confin, ancje dome chel che al passe di noaltris e chei altris. (A.I.) – 25.04.2025