“Arte e Libro” e puarte l’impegn sociâl ancje in Arabie

Par “Arte e Libro” ETS, la cooperative sociâl udinese impegnade intal inseriment di vore di personis cun disabilitât, il 2025 al sarà segnât tal mês di Jugn de partecipazion a une session de Onu a New York. Ma za ae fin di Zenâr, dopo dal invît rivât dal ministri pe Disabilitât Alessandra Locatelli, e je une altre ocasion straordenarie par presentâ lis propriis ativitâts. Miercus ai 29 il president Katia Mignogna e podarà contâ “Arte e Libro” in ocasion de tape in Arabie Saudite, a Gedda, su la nâf “Amerigo Vespucci”, velîr storic e nâf scuele de Marine Militâr taliane, ambassadôr dal Made in Italy intal mont insiemi al “Villaggio Italia”, un spazi inovatîf ae scuvierte dai tesaurs dal nestri Paîs. (A.I.) – 28.01.2025