Art in Tor: i “vuardians dal flum” par cuatri dîs a Seorgnan

Il progjet al è tacât trê agns indaûr. La idee, clare e nete, e jere chê di sensibilizâ i abitants e lis aministrazions publichis a colaborâ ae difese dal teritori. La ispirazion e rive dai “Vuardians de Tor”, la associazion nassude cu la voie di dâ vôs e cuarp a une comunitât di flum midiant il “contrat fi flum de Tor”, ven a stâi. Ven a stâi, un procès volontari par meti il flum al centri di dut e pe tutele di dut il so teritori, tirant dentri impresis, associazions, consorzis, aministrazions e soredut i citadins. Pe promozion de idee e je nassude cussì la manifestazion “Art in Tor”, un “festival des comunitâts de Tor” che dal an passât si davuelç tal parc di Seorgnan ,ufrint cuatri dîs di apontaments par ducj leâts ae idee di art e sostignibilitât: musiche dal vîf, escursions, laboratoris, contis ator dal fûc, un piçul marcjât di artesanât e soredut la pussibilitât di savê ce che si pues fâ par meti il flum al centri de comunitât. Inmaneât cu la colaborazion de Pro Loco, la associazion Alpine, lis associazions sportivis Grigioneri e Grigioneri 2000 di Seorgnan, il festival di davuelç tal parc “Tra la Tor e lis culinis” di joibe ai 28 e fint a domenie ai 31, cu la pussibilitât ancje di fâ cjamp sul lûc. (A.I. – 27.08.2025)