A Vilecjaze la storie di une furlane innomenade: Cora Slocomb di Brazzà

Al va indevant a Vilecjaze di Listize il viaç di “In file 2025” ator dal teme “Magisterium”, un progjet de associazion culturâl Colonos, fat cul contribût de Regjon F-Vj. Domenie ai 9 aes 4.30 dopomisdì si fasarà la conference di Marisa Sestito e Angelo Floramo, consulent sientific di “In File”, su “Cora Slocomb di Brazzà”, cui cjants de tradizion orâl feminine interpretâts dal duet Canti Vagabondi (Cjants Vagabonts), componût di Patrizia Bertoncello (vôs e ghitare) e Nilla Patrizio (vôs). Cora Slocomb (New Orleans 1862 – Rome 1944), une lûs de emancipazion feminine, pacifiste, leterade, cultore dal artesanât e de art, e rivà a trasmeti struments di cognossince e sfrancjament sociâl e di gjenar: in Friûl, ufrint aes feminis cualchi preziose oportunitât di lavôr; in Americhe, promovint la lôr produzion di picets e salvant de cjadree eletriche une zovine imigrade taliane. (A.I.) – 08.02.2025