Par figurâsi un avignì plui sostignibil ma ancje inovatîf, un grup di cincuante zovins e zovinis dai 18 ai 35 agns al è stât ancje chest an par une setemane in mont, a Valbrune, tal cûr des Alps Juliis, par frecuentâ i percors di formazion metûts adun de associazion ReGeneration Hub Friuli par fevelâ di inovazion, ambient e sostignibilitât. La setime edizion di “NanoValbruna”, il forum internazionâl dai zovins pe rigjenerazion, nassût di une idee di Stefano e Francesca Cercelletta, al è une ocasion di formazion e confront fats cun passion e competence. Un event di zovins pai zovins, un spazi viert par discuti e fâ nassi gnovis ideis, che al previôt incuintris e laboratoris ator dal teme dal an, “Imagjinâ par rigjenerâ”, che al vûl dî tac a pardabon a lavorâ par meti sù il doman des monts, no dome de nestre regjon. Une disfide par cui che al rivarà a Valbrune, ma ancje pes comunitâts locâls, che a puedin sielzi di lâ daûr a un model diferent di disvilup e di incressite. Fint a sabide ai 18, i 50 zovins e zovinis selezionâts a son stâts impegnâts intune schirie di percors di formazion leâts al teritori e al mont des impresis. Dut il festival al vûl rapresentâ une ocasion par creâ relazions, spartint esperiencis di là dal studi, dai incuintris cui esperts, imprenditôrs, professioniscj, gjornaliscj e sienziâts. La ultime zornade e sarà vierte propit a ducj, cun musiche, teatri, nature, mangjâ e bevi par ducj: une esperience – o plui di une – di vivi ducj adun. (A.I.) – 17.07.2026
Foto di M. Pascolat
