A Valbrune i zovins in vore par un avignî sostignibil

Une cunvigne, une rassegne ‘verde’, un festival dai zovins che al fevele di rigjenerazion e sostignibilitât, su la mont furlane. Dai 17 ai 23 di Lui a Valbrune e je in program une manifestazion di nivel internazionâl, ideade e inmaneade de associazion di promozion sociâl ReGeneration Hub Friuli. “NanoValbruna” al è soredut un moment di confront e di scambi par sienziâts, imprenditôrs, gjornaliscj e visionaris di dut il mont, adun cuntun grum di zovins di talent, par fevelâ di ambient, di economie circolâr, di tutele dai ecosistemis e par frontâ lis sfidis dal nestri timp cuntune azion sociâl e la “educazion” a deventâ imprenditôrs. La “rigjenerazion cence confins” e je il sproc di cheste edizion di une rassegne che vie pai agns e à tirât su un percors culturâl gnûf cun laboratoris sientifics pai fruts, – i“NanoPiçule”, che a tornin ancje chest an – e soredut “Baite Awards”, un concors internazionâl par zovins ricercjadôrs, students e imprenditôrs di doman, judicâts di une jurie, clamade a esaminâ i lôr progjets par un avignì diferent (cuntun premi di 1000 euros pe miôr “start up”). Novitât dal an: une residence par imparâ a fâ un cine curt, “From the change”, doprant dome il telefonin. (A.I.) – 16.07.2025