Concierts, visitis vuidadis e laboratoris par fruts. Al è ce che al previôt, in zonte des cerimoniis istituzionâls, il calendari siôr che il Comun di Udin al à preparât par celebrâ la “Fieste de Patrie dal Friûl”, che si celebre ai 3 di Avrîl. Une schirie di incuintris dedicâts ae culture e ae identitât dal popul furlan, cuntun voli al passât e un altri indreçât al futûr, che a metaran in contat int di ogni etât cu la lenghe furlane, un patrimoni regjonâl di tutelâ. Il prin event si tignarà lunis al prin di Avrîl tal Museu Etnografic dal Friûl: doi concierts di Alvise Nodale, une figure centrâl de gnove sene musicâl furlane, l’erêt de cjançon di autôr in Cjargne. Miercus ai 3 e sarà une zornade plene di avigniments istituzionâi, in presince dal sindic, Alberto Felice De Toni, tacant des 9 di buinore, cu lis targhis memoreativis dedicadis a doi grancj furlans dal Nûfcent: Pre Bepo Marchet e la scritore e poetesse Novella Cantarutti. (A.I.) – 29.03.2024
77
