A Udin e tache la “gnot” dai letôrs

La culture no si fâs ni intun dì, ni intune gnot, ma lavorant plan a planc sul teritori, cu la int. Il Comun di Udin al è tacât tal 2004 cuntun event che si clame propit “La notte dei lettori”, la gnot dai letôrs, par jemplâ di events une citât che di simpri e lei, plene di librariis, bibliotechis e editôrs. Daspò di cualchi an, la gnot e je deventade une zornade di apontaments e po dopo dôs e plui. Chest an a saran cuatri, dai 4 ai 7 di Jugn, daspò di une rassegne itinerante, “Aspettando la notte dei lettori” a torzeon sul teritori in 25 paîs e citats. Deventade vie pal timp un “organisim leterari”, un segnâl clâr di une culture cence confins, la “gnot” no je cambiade “parcè che al centri e je simpri une comunitât di letôrs, oms e feminis, che a ricognossin il dirit e la impuartance di lei – al sclarìs Federico Pirone, l’assessôr ae culture dal Comun di Udin – E lôr a son i vuardians e i testemonis de ricjece che la leture e puarte. Il spirt che o vevin dîs agns indaûr nol è cambiât, ma miorât: dome i numars dai apontaments a son diferents, cressûts simpri di plui!”. I prins, inmaneâts de diretore artistiche Martina Delpiccolo, a son la scree te ex glesie di S. Francesc cun Gian Antonio Stella e il spetacul conciert de Banda Osiris cul sienziât Telmo Pievani. (A.I.) – 03.06.2026