A Roncjis al scomence il festival dal gjornalisim

Martars ai 11 a Roncjis di Monfalcon e tache la decime edizion dal Festival dal gjornalisim di Leali delle Notizie, che fint a domenie ai 16 al ufrirà un calendari plen di ospits e di apontaments par rifleti sui temis principâi di atualitât, ma ancje su cualchi aniversari impuartant. Il moment centrâl de prime zornade, che e scomence za des 10 di matine cun incuintris, laboratoris e mostris, al sarà aes 7 sot sere tal Palatenda cu la scree uficiâl de rassegne, ae presince dal president dal Consei nazionâl dal Ordin dai gjornaliscj Carlo Bartoli. Daûr de tradizion, la scree e sarà ancje la ocasion pe consegne de tierce edizion dal premi “Leali Young” in memorie di Cristina Visintini, dedicât ai gjornaliscj aspirants dai 18 ai 35 agns: i vincidôrs a son stâts Emma Corrado e Morena Pinto. (A.I.) – 10.06.2024