A Radio Onde Furlane la vôs dal inteletuâl cjargnel Giorgio Ferigo

Ai 5 di Novembar dal 2007 al murive Giorgio Ferigo, ricognossût tant che un dal plui impuartants ponts di riferiment culturâi pe Cjargne e par dut il Friûl intal cors dal secont Nûfcent. A cuindis agns de sô sparizion, par iniziative de associazion Artetica e di Radio Onde Furlane, a vignaran onorâts il so pinsîr, la sô figure lis sôs ativitâts. Al poliedric inteletuâl a son dedicadis dôs iniziativis su la “radio libare dai furlans”. Sabide ai 5, tacant des 9.30 di matine, e sarà proponude la regjistrazion di un “storic” conciert dal 1988 dal Povolâr Ensemble, il so grup musicâl. La seconde si intitule “In forme di peraulas”: un radio documentari a pontadis, di vinars ai 4 aes 11 di matine, là che si podarà tornâ a scoltâ la vôs di Ferigo, che al fronte cierts dai temis a lui plui cjârs, de musiche ae produzion culturâl, ae storie de Cjargne. (A.I.) – 03.11.2022