A Puçui si celebre la bataie dal 1917 ancje cuntune mostre

A Puçui dut al è pront pes celebrazions dai erois de innomenade bataie dal 1917, che a dome cinc dîs dal disastri di Cjaurêt e fo il prin, impuartant moment di resistence dal esercit talian. Vinars ai 24 e sarà screade la mostre “Pozzuolo con le stellette, la battaglia in miniatura” (Puçui cu lis stelutis, la bataie in miniature), che e je la riproduzion precise e fedêl dal scuintri storic che al è rivât fint tes stradis dal paîs. Il model al darà la pussibilitât di viodi ducj i detai de difese, des trinceis fint ai sacs di savalon, ai soldâts. Lis celebrazions uficiâl de Bataie di Puçui a saran joibe ai 30 di Otubar in place Julia, ae presince de brigade di cavalarie “Pozzuolo del Friuli”, comandade dal gjenerâl Andrea Bertazzo. (A.I.) – 23.10.2025