A Glemone si scree un gnûf spazi pes mostris cui Beatles

Sessante agns indaûr, i Beatles a rivarin in Italie pe prime e uniche volte par savoltâ il Mont de musiche e chel dai zovins e nuie daspò di chel moment al fo compagn di prime. No in Friûl, po, che achì al jere avonde pôc, ma ben a Rome e Milan (e Gjenue) là che lis frutis a berlavin par dut il timp dai lôr storics concierts. Criticâts un pôc ancje dai inteletuâi de epoche (un di chei al fo Pier Paolo Pasolini!), cjalâts cun fastidi da cui che al veve plui di 25 agns, i Beatles a son durâts ancjemò uns cinc agns sui discs, ma la lôr storie no murarà mai. La Cineteca del Friuli di Glemone e dediche al grup inglês la scree dal gnûf spazi de Galarie de Cineteche, in via Bini, cu la mostre “HELP! 1965: Arrivano i Beatles”, par cure di Livio Toffol e di une idee di Livio Jacob,che si vierç vinars ai 19 di Dicembar aes 5.30 di dopomisdì. Visibile fint ai 6 di Avrîl dal an che al ven, di vinars a domenie, inmaneade cu la poie de Regjon e dal Ministeri de culture e il patrocini dal Comun, e presente al centri de esposizion cualchi foto mai viodude prime di John, Paul, George e Ringo, di proprietât de Cineteche, fatis di un fotograf diletant te suaze dal conciert di Milan di 60 agns indaûr. A contâ chel moment, i gjornaliscj de epoche che a forin li dal “Vigorelli” di Milan ai 24 di Jugn dal ’65, a Gjenue ai 26 e tal teatri “Adriano” di Rome ai 27 e ai 28: i plui innomenâts di chei a son Gianni Minà, che al è lât indevant a contâ par agnorums chei timps, e Dario Argento, che nol jere ancjemò deventât un regjist di sucès. E po dopo, in mostre a son manifescj, cuviertinis origjinâls dai discs a 45 zîrs di chei prins agns di cariere, libris che a son rârs di cjatâ e cetantis robis e robutis che a levin fûr par publicizâ il grup inglês. E, stant che i parons di cjase a son esperts di cine, ancje lis dôs peliculis cui Beatles protagoniscj: “A Hard Day’s Night”, jessût in Italie tal 1964 cul titul “Tutti per uno”, Ducj par un, e “Help!” dal 1965. La mostre dedicade ai Beatles de metât dai agns Sessante e sarà screade dal critic musicâl e condutôr radio John Vignola, che al contarà i cuatri di Liverpool in Italie cul colezionist Domenico Gavella, prime di un concietr cu lis musichis dai cuatri inglês. (A.I.) – 18.12.2025