In ocasion di Friuli Doc, sabide ai 13 di Setembar aes 16.30, te Sezion Moderne de Biblioteche Civiche “V. Joppi”, la ARLeF – Agjenzie Regjonâl pe Lenghe Furlane e invide ducj i fruts a “Bon complean Maman!”, un dopomisdì di zûcs e animazion par furlan.
L’event, inmaneât de ARLeF in colaborazion cun Comun di Udin, Biblioteche e Telefriuli, al sarà la fieste pai 10 agns de trasmission televisive par furlan che ur plâs cussì tant ai fruts. La stagjon numar 10 e tacarà propit cun Otubar.
Protagonistis di cheste “fieste di complean” a saran la famose condutore Daria Miani, la sô “vicine di cjase” Desiree Chiappo Debegnach e la vivarose “cusine Bete”.
A cjaparan dentri i fruts intun laboratori divertent e no mancjaran sorpresis e gadgets par ducj. Il laboratori al è indreçât ai fruts dai 4 ai 10 agns. Par partecipâ bisugugne notâsi dentri di vinars ai 12 di Setembar, scrivint ae direzion email info@sportelfurlan.eu. (a.d.g.) – 08.09.2025
