A Dieç une mostre cun oparis mai viodudis prime

Ai 6 di Jugn a Dieç si vierzarà la gnove mostre dal comitât che di agnorums e puarte in Mont cualchi opare mestre di nivel mondiâl. La gnove propueste, vierte fint ai 9 di Novembar, e sarà intitulade “Ricchezza. Dilemma perenne” (Ricjece. Dileme eterni) e e presentarà ben 52 oparis (l’an passât a jerin 40) par un viaç te bielece vie par cinccent agns, che al va dal Cuatricent fint al Nûfcent. Lis oparis sieltis a son di cualitât cetant alte, plui di simpri, cu lis pituris dai plui grancj mestris de storie: Caravaggio (l’innomenât “Fantat muardût di une lisierte), Tiziano, Rembrandt, Pieter Brueghel il Vecchio, Pablo Picasso, Renato Guttuso e Pelizza da Volpedo cuntune des oparis plui iconichis dal Nûfcent, “Il quarto stato” (Il cuart stât). Ai 26 di Mai a saran disvelâts ancje altris nons e tal ultin la mostre e ufrirà la pussibilitât uniche di viodi ben 17 cuadris che a vegnin di colezions segretis, sieradis al public fin cumò. (A.I.) – 06.05.2025