A Dieç il “dialic” dai grancj de art

La prime mostre, passe vincj agns indaûr, e fo dedicade a S. Florean e tal so non al è nassût chel comitât che al à mudât un borc parsore Tumieç, Dieç, intun lûc cognossût in dute la Italie pe art, là che a son rivâts 750 mil visitadôrs vie pai agns. Il comitât organizadôr cul diretôr artistic pre Alessio Geretti a àn fat il “miracul” di meti al centri la perifarie e di puartâ intun borc di 300 personis su lis monts passe 1600 di oparis mestris dai plui grancj autôrs de storie de art, simpri leâts di un teme comun, simpri cu la idee che la bielece di cuadris e sculturis e sedi buine di fevelâ al cûr di oms e feminis, propit tant che la fede. La mostre che si scree joibe ai 11 di Jugn te cjase des esposizions di Dieç e je “Il dialogo”, il dialic, e e met in struc 2500 agns di arts e bielece, dal cuart secul prime di Crist fint ae metât dal Nûfcent. Lis oparis in esposizion a saran 52, pituris e sculturis che in cualchi câs – in dut, 17 tocs – a vegnin di colezions segretis, mai vierzudis al public e si che duncje che si viodaran pe prime volte in Cjargne. I nons di une esposizion che e je presentade tant che un spetacul di incjant, plen di stimui che a fasaran pensâ ducj, e je un viaç tal timp e un struc di bielece, che al fevele de necessitât di dialic te vite di ducj e te storie dal mont. Un messaç etic e spirituâl une vore fuart, let traviers de iconografie doprade te piture e te sculture un secul daûr di chel altri. Un teme sielt parcè che propit in chest moment storic e je la dibisugne di tornâ a cjatâ la capacitât di ve un dialic in ogni ocasion: in cjase, di une gjenerazion a chê altre, di un popul dal mont a chel altri. I artiscj plui innomenâts a son par sigûr Pablo Picasso, Francesco Hayez- il riferiment dal Risorgiment, cuntun pâr di oparis di no dismenteâ, Michelangelo Merrisi cognisût cul non di Caravaggio cun dôs opariis – une des versions di “L’incredulità di Tommaso” e il “Sant’Agostino in meditazione”, tornade fûr di pôc. E po dopo, il mestri de lûs e de miezeombre Mathias Stom, Giambattista Tiepolo, Pietro Longhi, Giovanni Fattori, Giuseppe De Nittis e cetancj altris. (A.I.) – 10.06.2026