A Cormons si tornin a contâ i confins

La tierce edizion dal festival de informazion “Il Mondo fuori”, Il Mont di fûr, inmaneât dal Comun di Cormons, e torne di joibe ai 19 e fint a domenie ai 22 daspò di jessi stade scancelade tal mês di Novembar par vie de montane che e veve sdrumât il teritori, massime Braçan. Cheste edizion e sarà ancjemò plui impuartante par tornâ a partî, ancje cul jutori di une racuelte di fonts a pro di cui che al à vût dams. Il teme sielt de diretore artistiche Luana de Francisco al è compagn: “Contâ il confin. Storiis e imagjinis jenfri passât, presint e avignî”. Une maniere par confrontâsi e tornâ a cjatâsi intune comunitât che e à sufiert, cuntun mosaic di storiis, esperiencis e tradizions. Si tache cuntune vôs inmaneade dal gjornalisim talian, la inviade di vuere Lucia Goracci, cul espert di gjeopolitiche Dario Fabbri e Paolo Mosanghini. Vinars ai 20, une schirie di ospits, dal scritôr Alessandro Cattunar ai cogos Fares Issa e Kevin Gaddi ai esperts di ambient Edoardo Vigna e Giorgio Alberti. Sabide ai 21, la frontiere e devente musiche cul tercet di Teo Collori Trio, ma ancje testemoneance cun Raoul Pupo, Angelo Floramo, Igor Komel e Alfonso Di Leva. Par sierâ, un spetacul multimediâl dedicât a Robert Capa e la sieradure de mostre sui confins “Limina”. (A.I.) – 18.02.2026