A Çarvignan une rassegne par cui che al “olse”

Si fasarà come simpri a Çarvignan, Di miercus ai 15 e fint ai 19 di Otubar, la otave edizion dal “Festival del coraggio”, la rassegne dal cûr, de olse, inmaneade de associazion culturâl Bottega Errante cu la poie de Regjon, de Fondazion Friuli e dal teatri “Pasolini”. Daspò di cualchi zornade di anteprime vie pes ultimis setemanis, cinc dîs di incuintris, presentazions di libris, musiche e spetacui teatrâi, par cirî di rivâ a lei ancjemò un Mont che al somee daûr a sfantâsi o propit a disfâsi. Par capî lis debilitâts dal dì di vuê, une schirie di ospits tal Teatri, te cjase de Musiche, la biblioteche “Zigaina” e tal “Zardin dai dirits”: la gjornaliste Manuela Dviri, la vôs de place di Tel Aviv, che e screarà la rassegne tal dopomisdì. E po dopo, tai dîs che a vegnin, Don Luigi Ciotti, la campionesse Mara Navarria, il musicist Massimo Zamboni cuntun spetacul dedicât a Pasolini e cetancj altris. (A.I.) – 14.10.2025