A Çarvignan si celebre Pasolini tal so teatri

Il teatri di Çarvignan al à previodût dôs zornadis inmaneadis di Euritmica par memoreâ la muart di Pier Paolo Pasolini, ai 2 di Novembar dal 1975, cincuante agns indaûr. Martars ai 4, sot sere, tal teatri che al è il so non, al rive in repliche il spetacul “Nel cuore della realtà”, Tal cûr de realtât, dedicât al rapuart dal autôr cun leterature e cine, par cure de Civiche academie di art dramatiche “Nico Pepe” di Udine, cu la regjie di Claudio de Maglio. Il stes dì, tal dopomisdì, presentazion dal libri “Pasolini: ordine eseguito” di Simona Zecchi, in dialic cun Alessandra Kersevan. Miercus ai 5 invezit e sarà presentade la racuelte “Lettere a Maria Seccardi”, cu lis letaris dal poete a une zovine furlane tai prins agns passâts a Rome. Sot sere, il conciert “Lyra”, musiche e poesie no dome dal autôr di Cjasarse, cu la cjantante furlane Elsa Martin e il pianist jazz Stefano Battaglia. (AI.) – 03.11.2025