A Aquilee il studi di dôs danzis tradizionâls

Martars ai 24, aes trê e mieze di dopomisdì, la Sale Conferencis dal Palaç Brunner-Segré di Aquilee e ospitarà il prin event public dal progjet “Dal Salento a Aquileia”, promovût de Fondazion “La Notte della Taranta” e de Fondazion Aquilee, in colaborazion cu la Regjon Pulie. La regjon Friûl-Vignesie Julie e la Union dai Grups Folcloristics dal F-Vj. L’incuintri, intitulât “Patrimoni intangjibil, tradizions e fonts storichis: un confront di prospetivis metodologjichis”, e je la prime iniziative publiche dal progjet e al è stât pensât in forme di un grup di ricercje, par scomençâ une discussion critiche di studiôs e professioniscj su cuistions metodologjichis e interpretativis di doi patrimonis di culture diferents. Il repertori de “pizzica pizzica” e chel de “furlana”, dôs danzis tradizionâls lontanis, al sarà frontât, par tacâ, intun seminari che si concentrarà duncje su la relazion di fonts storichis e patrimoni intangjibil, su la pluralitât dai nivei analitics e su la comparazion dai teritoris diferents: il Salent e il Friûl. (A.I.) – 24.03.2026