A son stadis fatis sù uns cent agns indaûr, tai agns che a van de fin de Prime ae Seconde vuere mondiâl: i timps dal Fassisim in Italie, cuant che di ogni bande a nasserin scuelis pe infanzie, scuelis che a son stadis monuments, e chês cjasis pe zoventût che i disevin “de Gil” o “dal balilla” cuant che al jere il Fascio. Lûcs che dispès no si rivin plui a viodi o a cognossi, cambiâts par fûr o doprâts par alc altri, cuant che no son lâts a tocs o colâts jù. Il PIC, progjet integrât culture dal Friûl di Mieç, che vie pal timp al à mapât lis gleseutis dal teritori, lis dimoris storichis publichis e privadis, presincis de antighe Rome e vie indevant, al è in vore par un gnûf progjet di studi, riscuvierte e divulgazion dai edificis e monuments nassûts tal Friûl di Mieç e te Basse dal 1920 al 1945, dispès par merit di grancj architets e artiscj di chê volte: “Architeturis pe educazion de zoventût”. Daûr dal progjet, chestis architeturis no son dome testemoneancis de edilizie, ma lis olmis di un passât cuant che la urbanistiche, la educazion, la memorie publiche e la rapresentazion dal podê a jerin instreçâts avonde a fuart. La ricercje fate cu la poie de Regjon e jude a lei il teritori tant che riflès di modei culturâi e politics doprant propit chei lûcs cualchi volte dismenteâts: lis scuelis monument, chês pe infanzie e lis cjasis “dal balilla”. Lis testemoneancis di architeture pe zoventût dome tai 17 comuns dal Friûl di Mieç e de Basse dentri dal PIC a son uns sessante, studiadis di une schirie di storics e di architets, lant a cirî tai archivis dai comuns, des glesiis e chei privâts dal teritori. Lis scuviertis a saran pandudis intune grande cunvigne che si fasarà te vile Manin. (A.I.) – 04.04.2026
Foto di E. Falaschi
