Zovin operari di Glemone muart daspò di un incident sul lavôr

Daspò cuatri dîs di agonie al è muart tal ospedâl di Padue il zovin operari di 27 agns che al viveve a Glemone che al jere stât ferît ai 26 di Jugn in maniere fuarte intant che al jere impegnât intun lavôr di manutenzion stradâl in Venit, a Due Carrare in provincie di Padue.

Il zovin di nazionalitât albanese e dipendent di une imprese edîl al veve cjapat in plen sul cjâf un pâl di len di chei doprâts pes telecomunicazions che i jere rivât intor par causis ancjemò di sclarî.

L’om al jere stât puartât di corse tal ospedâl di Padue, tal repart di rianimazion, indulà che al è mancjât. Su ce che al è sucedût a stan indagant carabinîrs e tecnics dal Spisal de Ulss 6 Euganea. (a.d.g.) – 02.07.2026