Incident mortâl îr di gnot a Glemone. A pierdi la vite un fantat di 20 agns dal puest, Matteo Pittana: la Bmw Serie 3 là che al viazave intune cun doi coetanis e je finide fûr strade, sorpassant il pontesel che al è in vie della Turbina, strade perpendicolâr a pet de statâl 13, par dopo colâ intal canâl Ledre-Tiliment.
Ae vuide al jere un altri fantat di 20 agns di Trasaghis. Al so flanc al jere sentât un amì di Tumieç. Ducj i doi, a ben che cun dificoltât, a son lâts fûr dal auto e si son metûts in salf.
Te sente daûr al jere Pittana. Il zovin, forsit ancje par vie des contusions ripuartadis intal incident, nol è rivât a lâ fûr dal abitacul. Al è restât impresonât intal auto e al sarès muart par inneament.
Intant conducent e passizîr a varessin domandât aiût, ma cence clamâ il numar unic pes emergjencis 112.
Si saressin dreçâts a une tierce persone – al moment il segret dai carabinîrs al è massim – che, a sô volte, al à segnalât ai militârs de Arme doi zovins in dificoltât. La domande di intervent, duncje, no jere par incident stradâl. Di fat i carabinîrs de Radiomobile di Tumieç e chei di Glemone si son puartâts, in principi, intun puest diferent a pet di dulà che la auto e jere lade fûr di strade.
Dome intun secont moment, duncje, al sarès vignût fûr che la Bmw e jere finide intal canâl e che dentri al fos ancjemò Matteo. In vie della Turbina a son rivâts lis vuardiis dal fûc dal distacament di Glemone cui coleghis dal Nuclei speleo alpin fluviâl e un autogru di Udin. Cuant che la machine e je stade individuade, i socoridôrs a àn cjatât Matteo aromai cence vite, ancjemò sigurât aes cinturis di sigurece daûr. Il cadavar al è stât mitût a disposizion de autoritât judiziarie, che e je daûr a valutâ ancje la posizion dai doi amîs. (a.d.g.) – 19.02.2024
