Dilunc des viis di Udin te zone a nord, vie pe gnot di domenie, i carabinîrs si son butâts daûr di une machine cun dentri dôs personis che no si jere fermade intant che a stavin fasint controi cuintri des robariis intes cjasis.
Dut al è tacât a Tavagnà, cuant che une patulie e à intercetât une auto suspiete e il vuidadôr al à acelerât cirint di scjampâ. La Centrâl operative e à mandât une altre patulie de sezion radiomobile e cualchi centenâr di metris plui indenant il mieç al è stât blocât.
Il vuidadôr al à cirût di slontanâsi a pît, ma al è stât blocat daurman, intant che il passizîr al à rivât a scjampâ. Des investigazions al è saltât fûr che si tratave di un zovin di 17 agns, cence patente e che la auto e jere stade robade vie pe gnot di sabide a S. Michêl. La machine e je stade tornade ai proprietaris, ma il zovin incensurât al è stât denunziât par ricetazion e resistence a uficiâl public e compagnât li de sô famee. (a.d.g.) – 02.03.2026
