Walace si ribalte: la machine a fûc, lui salf

Walace Souza Silva, il centricjampist brasilian dal Udin, al è lât fûr franc di un incident ae vuide de so auto, che si è ribaltade par causis in cors di aciertament, lant a fûc. Al è sucedût di gnot jenfri lunis e martars a Udin, in viâl Vignesie. Il zuiadôr, strassunît, al è lât fûr in maniere miracolose de veture, cence dams. I infermîrs de Centrale Sores a àn coordenât, aes 3 di gnot, l’intervent di socors a Udin, ae altece de gnove taronde, dongje dal Lidl. Pal zuiadôr, par fortune nissune consecuence sanitarie particolâr, ma al è stât traspuartât in dut câs al pront socors par aciertaments. (A.I.) – 11.10.2022