Passe 28 mil intervents e 1.630 indagâts tal 2025 e tai prins sîs mês di chest an a contin dal grant lavôr fat dai financîrs in Friûl Vignesie Julie. Chescj dâts a son stâts pandûts te suaze des celebrazions pai 252 agns di ativitât dal cuarp.
Se si fevele di controi fiscâi, e je stade cjatade une evasion di 13,3 milions di euros cun 309 sogjets denunziâts e doi arestats in 5.316 investigazions. Sul front de spese publiche invezit a son stadis fatis 242 investigazions su redit di citadinance, assegni di inclusion e supuart pe formazion e il lavôr, intant che a son stâts denunziâts in 213 ae Cort dai Conts par un dam erariâl di passe 15 milions e mieç di euros.
Di no dismenteâ lis dôs operazions che a àn permetût di scuvierzi dôs fabrichis clandestinis di spagnolets fals a Spilimberc e Remanzâs. Impuartants ancje i doi milions di robe contrafate, i 258 chilis di droghis cjatadis e il salvament di 230 personis de bande dal socors alpin. (a.d.g.) – 26.06.2026
