A son lâts indenant par dute la gnot i intervents dai pompîrs par cause dai dams provocâts de bugade di maltimp che su la nestre regjon e à puartat aghe a seglots cuntune vore di inagaments e aiaron, in cierts câs ancje trombis di aiar, come chês regjistradis a Dignan e a Buie. A son stâts almancul vincj i intervents di socors urgjent finîts des 8 di sere di îr aes 8 di vuê di matine des scuadris dal Comant di Udin.
Intal dopomisdì di îr sul tart, une trombe di aiar e à batût lis zonis di Dignan e di Buie, tirant ju arbui, fiscant lis struturis de sagre di Dignan e fiscant ancje cuvierts, tant che des 6 aes 8 di sere a jerin stâts passe 50 i intervents di socors par tirà vie arbui colâts e ramaçs e meti in sigurece i cuvierts ruvinâts e altris struturis instabilis. Intervignudis scuadris che a rivavin ancje di Codroip e Spilimberc, intant che a Buie al à lavorât par meti a puest i cuvierts ruvinâts il personâl dai Vigjii dal fûc di Glemone.
A Codroip par un fûc impiât di une saete intun cuadri eletric a son invezit rivâts i pompîrs di S. Vît dal Tiliment.
La ultime emergjence a Tor di Zuin vuê sul cricà dal dî par cause di un ramaç grues colât suntune machine, par fortune cence fa mâl a nissun. (a.d.g.) – 23.05.2025
