Un dai cjaçadôrs che a jerin a cjace îr cun Paolo De Luca, l’om pensionât di 70 agns copât di une fusilade tai boscs di Faedis, al è stât iscrit tal regjistri dai indagâts par omicidi colpôs.
Il colp al sarès partît cence volê, su la fonde des primis ricostruzions, dal fusîl di un compagn di cjace che si sarès inçopedât intant che al cjaminave daûr de vitime. La Procure de Republiche e à decidût di fâ la autopsie par sclarî lis dinamichis dal incident e lis causis de muart.
A Faedis, il paîs indulà che al jere a stâ De Luca, al è grant corot tinte comunitât: “La autopsie – al à sotlineât il sindic Luca Balloch – e fasarà lûs su ce che al è sucedût e ancje no o stin spietant di capî il parcè di chest incident. Pal moment no savìn nancje cuant che si podarà fâ il funerâl”. (a.d.g.) – 13.10.2025
