La zonte comunâl di Udin e à dât il vie libare al recupar e ae valorizazion dai doi lûcs daspò vê aprovât il progjet di fatibilitât, dal valôr di 900 mil euros, che al sarà finanziât par 700 mil euros de Regjon e pal rest cun bêçs dal Comun.
Il progjet al previôt di trasformâ la part orientâl de place, chê dongje ai zardins Riccasoli, che e sarà dedicade a cui che al va a pît o in biciclete. Al puest dal asfalt al rivarà glerein e e sarà slargjade la part cul prât.
Cheste soluzion, cjatade adun cu la Sorintendence, e permetarà di tirâ vie cusi mil metris cuadris di materiâl impermeabil. “Cun chest progjet – al à comentât l’assessôr al vert public, Ivano Marchiol – o intervegnin suntun spazi storic une vore amât de int, zontant tutele, valorizazion dal vert e adatament de citât ai efiets dai cambiaments climatics.
I lavôrs e proviodin ancje il restauri conservatîf dai Zardins, indulà che e sarà metude gnove iluminazion e telecjamaris di control, metût a puest il paviment e metût in sigurece il troi dilunc de roie. Il progjet esecutîf al varès di rivâ dentri di Otubar intant che i lavôrs a varessin di tacâ tal principi dal 2027. (a.d.g.) – 28.07.2026
