Vicin di cjase al tormente une cubie di anzians a Faedis e al ven arestât

da Alessandro Di Giusto

I carabinîrs a àn arestât a Faedis un om di 36 agns che al leve indevant a perseguitâ i vicins di cjase anzians, costrets a lâ vie cjatant ospitalitât di un parint.

La acuse e je di ats persecutoris e violazion dai proviodiments di slontanament de cjase familiâr e de improibizion di svicinament ai lûcs frecuentâts de persone ofindude. Lis vitimis a son om e femine, cun plui di setante agns di etât che, esasperâts di une situazion che e durave di timp, l’an passât si jerin indreçâts ai carabinîrs.

I doi anzians a vevin denunziât, in particolâr, episodis di ats persecutoris, violence privade, lesions personâls, pachis e dams, che di chei si jere fat protagonist il vicin di cjase.

Viers dal om, za cognossût des fuarcis dal ordin, il Gip dal tribunâl di Udin al veve mandât fûr un proviodiment cautelâr di improibizion di svicinament aes personis ofindudis. Misure che l’om al veve però plui voltis deludût, tant che al jere stât denunziât ancje par cheste violazion. Al jere stât duncje sometût ae misure cautelâr de improibizion di vivi intal comun di Faedis, ma ancje cheste però e jere stade violade daurman.

A chel pont la uniche pussibilitât restade e jere chê di domandâ la misure cautelâr in preson che, su proviodiment de autoritât judiziarie, i carabinîrs a àn fat sabide dopomisdì. (a.d.g.) – 12.02.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui