Al sarà pardabon dificil dismenteâ la tape dal Zîr di Italie in Friûl, no tant pal risultât sportîf. Jonas Vingegaard, dal Team Visma, al à dimostrât ancjemò une volte, rivant par prin sul travuart dal Plancjaval dopo 199 chilometris plans di rivis cussì duris di taiâ une vore di gjambis, che al merte la maie rose.
Cheste tape però e sarà memoreade pe grande fieste di popul che dut il mont al à podût viodi, te suaze cincuantesim aniversari dal taramot. No jere une strade di paîs indulà che a passavin i coridôrs che no fos plene di int e di cartei, balonuts, bicicletis vecjis coloradis di rose, musiche e ligrie.
Il lavôr di preparazion al jere tacât m”s prime metint a puest dutis lis stradis, in graciis di un sfuarç fat di dutis lis istituzions – de Regjon ai Comuns – e di dai ents che a jerin cjapâts dentri, cuntune corse cuintri dal timp par meti dut in ordin. Ancje i furlans dut câs a àn fat dal lôr miôr: par dute la setemane prime de tape si viodeve int al lavôr par picjâ flocs, curdelis, balonuts e ancje platuts, ducj colorâts di rose, cence dismenteâ strissons e ancje iniziativis pardabon simpatichis, che a àn trasformât cheste gare sportive intune moment di serenitât e, come che o vin dit, di fieste par dutis lis comunitâts tocjadis de Corse Rose.
Cussì a Glemone, indulà che e jere la partence e chel di stes in ducj in Comuns traviersâts,cuntun moment une vore preseât des televisions a Buie, cuant che Jonathan Milan sui ferme par saludâ la famee e i siei amîs.
Une zornade di no dismenteâ, parcè che i furlans, ancje chei che in chescj mês si son impegnâts parcè che dut al las pal miôr – impussibil no visâ il lavoron fat di Paolo Urbani che al à cjapât su il testemoni di Enzo Cainero – a àn mostrât ce che a son bogns di fâ a dut il mont.
Lis fotos dopradis par chest articul a son stadis fatis te piçule frazion di Pers di Maian, ma al baste dâ une cjalade su la Rêt par viodi trop partecipade e fiestose e je stade cheste tape dal Zîr di Italie in Friûl. (a.d.g.) – 31.05.2026
