Ancjemò un brut incident indulà che e je stade cjapade sot une fantate che e stave passant suntun passaç pedonâl. E ancje in chest câs, come pal teribil incident che la setemane passade al à copât a Prissinins la frutate di 17 agns Alice Morsanutto, la vitime e je une studentesse. Il fat al è sucedût vuê di buinore a Monfalcon, in vie Valentinis, indulà che e je stade tirade sot di une Ford Kuga vuidade di un polac di 33 agns.
Il colpal è stât une vore fuart e la fantate daspò ve batût cuintri dal veri denant de machine e je stade sbalçade a metris di distance. La zovine che e à patît un traume cranic e je stade daurman puartade cul elicotar in cundizions une vore grivis tal ospedâl di Triest tal repart di terapie intensive. (a.d.g.) – 15.10.2025
