Al è rivât il moment de scree uficiâl. Un dai progjets di Gianpietro Benedetti, president de Danieli, par insiorâ la ‘sô’ citât, al è deventât concret, ancje se lui dal Avrîl dal an passât nol è plui cun nô. Al sarès stât une vore content di ce che e je deventade Cort di Puarte Vilalte: dulà che e jere la fabriche bandonade de bire Dormisch, sdrumade passe vincj agns indaûr di un incendi, cumò al è un puest di design architetonic, cun edilizie verde che al dopre pocje energjie e che al à dentri l’Its Academy, ven a stâi l’istitût che al forme i tecnics dal doman, soredut pe industrie.
La idee dal progjet e jere vignude fûr tal 2021 e za tal Autun di chel an il grup Danieli al comprave il puest. Te Vierte dal 2022 a tacavin i lavôrs par netâ dut, ancje dai tocs di amiant, e ae fin di chel an i vecjos mûrs a son lâts jù. Scomençant il 2023 si vierzeve il cantîr par fâ sù la gnove struture: 6 mil metris cuadrâts cuvierts, puest par 600 students, une plaçute a sotet dulà che si puedin fâ ancje concierts e ancjemò bar, bistrot e altris servizis cun 1.500 metris cuadrâts, sot tiere un parcament par 120 machinis e fintremai un piçul parc su la spice dongje de roie. In dut un cost di 25 milions di euros.
I timps dai lavôrs a son lâts, plui o mancul, come di program e za di cheste Vierte l’Its Academy al à tacât a movisi culì de vecje sede a Felet. A Setembar lis lezions dal gnûf an a son tacadis in regule, cun ancje ducj i laboratoris che a àn la plui gnove tecnologjie. Ae fin, a metât Otubar, la scree dal toc public, dulà che al è ancje il piçul ristorant. Cumò la scree uficiâl di dut cun chei che a àn lavorât a chest sium adun cu lis autoritâts. Cort di Puarte Vilalte no je dome une scuele, ma un puest dulà che si insegne il savê fâ e si fâs ancje culture. Une fabriche dal doman, propit come che le voleve Benedetti. (R.C.) – 28.10.2025
53
