Un om di 50 agns di Udin al è stât arestât dai carabinîrs intant che al cirive di robâ intune machine parcade in vie Colugna. Al veve a pene rot il barcon cjapant sù un borson cun dentri documents e i efiets personâi dal paron.
Un om di 24 agns, ancje lui di Udin, al è stât segnalât par tentatîf di robarie. Al à cirît di vierzi la puarte di une machine tal parc di Poltrone e Sofà a Reane dal Roiâl.
Un altri tentatîf di robarie al è sucedût îr sot sere, cuant che dai malvivents, cuntune Panda, a àn cirût di doprâ la machine come un roc par sfracaiâ la puarte di jentrade dal centri comerciâl Bennet di Pradaman. No rivant, i delincuents a àn cirût di sfuarçâ une des puartis, ma ducj i tentatîfs no son lâts a bon fin. I ladrons a son scjampâts a pît, lassant li la machine, che e jere stade robade. (a.d.g.) – 09.01.2026
