Gnove linfe pes malghis e i ripârs dal cjanâl de Ciline: in graciis di un contribût di 120 mil euros, la aministrazion comunâl di Claut e à decidût di fâ intervents di manutenzion straordenarie su cualchi edifici di sô proprietât. Lis oparis a permetaran di conservâ e valorizâ i fabricâts, mantignint lis lôr carateristichis e promovint il lôr disvilup.
I edificis individuâts pal intervent a son Casere Casavento, Casere-Ripâr Pradut e il Mulin di Lesis. In particolâr, chest ultin al sarà destinât ae promozion turistiche e al deventarà un pont di riferiment pai escursioniscj e i apassionâts des nestris monts. Il progjet definitîf – esecutîf pai lavôrs al è stât fat bon concuardant i intervents cui gjestôrs dai edificis: al è un pas impuartant bande la conservazion e il rilanç di chescj edificis storics e des lôr tradizions. “O sin braurôs di podê fâ chescj intervents sui nestris edificis storics plui impuartants – al à dit il sindic di Claut, Gionata Sturam -. La conservazion di chest patrimoni e je fondamentâl par preservâ lis nestris tradizions e promovi il disvilup turistic de nestre comunitât”. (A.D.G.) – 15.12.2022
