Prime cualchi vôs che a contave di stranis presincis intal bar Esco Pazzo a Roncjis di Monfalcon, daspò lis investigazions fatis doprant ancje poliziots che a fasevin finte di jessi clients, sentâts ai taulins.
Par mês i agjents a àn controlât il lâ e vignî di int e i moviments dal gjestôr, un om dal puest di 49 agns. A son stâts documentâts cetancj câs di spaç e ai 10 di Avrîl, i poliziots a son jentrâts in azion intant che l’om al stave ritirant di un serp di 24 agns 11 grams di cocaine.
Lis percuisizions fatis daspò a àn permetût di cjatâ ancjemò altris 10 grams di droghe e un belancin di precision. Ancje la testemoneance fate di cierts clients e à confermât il fat che il locâl al jere deventât un pont di riferiment pe droghe. Il gjestôr al è stât arestât intant che il serp rivât cuntun sloven di 23 agns al è stât denunziât a pît libar.
Par di plui, il Cuestôr di Gurize al à sospindude par un mês la licence sierant il locâl. (a.d.g.) – 07.05.2026
