Un an di preson patizât pal omicidi stradâl in vie Forni di Sotto a Udin

Il gurizan Luca Parise, di 25 agns, che al veve cjapade la siore cinese Fengxiu Wang di 53 agns a Udin, intant che al vuidave la sô auto dilunc vie  Forni di Sotto ai prin di Avrîl dal 2023, al à patizât par omicidi stradâl. La pene decidude dal Judiç pe udience preliminâr Mariarosa Persico dal tribunâl di Udin e je stade di un an di reclusion, sospindude. La puare femine e stave traviersant la strade dongje des strichis cuant che il zovin al è rivât di plaçâl Chiavris. Forsit par colpe dal soreli che al stave lant jù al veve tirât sot la vitime che e je muarte trê setemanis plui indenant par vie des feridis. (a.d.g.) – 17.06.2025