La citât si sta preparant al martars che al ven, ai 14 di Otubar, cuant che tal dopomisdì al sarà il corteu a pro de Palestine e dopo, sot sere la partide di balon tra Italie e Israêl.
A dâ pinsîr al è soredut il corteu che al sarà fat pes stradis dal centri storic tant che il prefet di Udin, Domencio Lione al à firmât une ordenance che e previôt misuris straordenariis daspò che l’Osservatori talian su lis manifestazion sportivis al à dât ae partide un “grât di risi une vore alt”.
Pal pinsîr che a jentrin violents dentri dal corteu, lis misuris a pontin a tirâ vie dut ce che al podarès jessi doprât par fâ dams. Lis restrizions a saran in vore des 8 di matine ae miezegnot dai 14 inte aree che e cjape dentri dut il centri storic (Europa Unita, D’Annunzio, XXIII Marzo, Trieste, Oberdan, Caccia, Osoppo, Di Toppo, Diacono, Bassi, Cavedalis, Ledra, XXVI luglio, Duodo, Cella e Ferriere).
Improibide la soministrazione vendite par puartâ vie di mangjative e robe di bevi dentri di butiliis di veri, ceramiche o latine. Par di plui, cui che si cjatarà intune aree publiche nol podarà tignî o bevi robe tignude dentri il veri.
Ducj i publics esercizis e lis ativitâts comerciâls a saran obleâts a tirà vie dute la robe che si cjate di fûr (taulins, cjadreis, ombrelons , foncs che a scjaldin, vâs pes rosis se si rive a tirâju su e espositôrs de publicitât) dute robe che e podarès jessi doprade come strument di ofese o ingrumade.
Il plan di sigurece metût a pont de Prefeture al previôt ancje il supuart dal Esercit e la presince dai reparts speciâi inte citât e ator dal stadi. (a.d.g.) – 09.10.2025
