Trufadôrs in azion al telefon

La Polizie di Stât e à tirat sù desenis di segnalazions di citadins e utents contatâts di trufadôrs che in aparence a dopravin numars riferibii a Poste Italiane o fintremai ae stesse Polizie Postâl dal Friûl-Vignesie Julie. I fals operadôrs dal servizi di sigurece a informavin lis vitimis di une serie di conessions anomalis sul lôr cont, invidantlis a clicâ suntun link e a meti i codiçs di acès personâi. Intun secont moment, il fraudât al vignive contatât di chei che a pretindevin di jessi agjents, che lu invidavin a fâ un bonific suntun cont definît sigûr, che in realtât al è controlât dai delincuents. La stesse Polizie Regjonâl postâl e invide a vuardâsi di cui che, pûr vendintsi par operadôr des Fuarcis dal Ordin, al domandi la esecuzion di bonifics o paiaments in cualsisedi forme o di cui che al clame par domandâ lis credenziâls di acès al cont o il moviment di bêçs su conts diferents dal propri. (a.d.g.) – 29.11.2023