Trê todescjis a clamin il 112: masse dificil il troi a Pas Rest

La stazion di Manià dal Socors Alpin e lis Vuardiis dal Fûc a son intervignûts te gnot jenfri martars e miercus par cjatâ e socori trê escursionistis che a vevin domandât jutori inte zone ator di Pas Rest. La clamade al Nue 112 e je rivade pôc daspò lis 8 di sere, cu la ativazion imediade de stazion di Manià dal Socors Alpin, che e je lade al Pas e dopo a Casera Rest a cuote 1500 metris. Lis trê escursionistis, todescjis di 22, 38 e 47 agns, si cjatavin a cuote 1200 e a son stadis cjatadis in trê cuarts di ore di sîs socoridôrs: a volevin fâ dut l’anel di Malandreit a Sopareit traviers il troi 826 “Ursule Nagel”, ma lu àn sotvalutât, almancul intai timps di percorince. Cussì, si son fermadis cence fuarcis dongje di Casera Forchia, dulà che i socoridôrs lis àn cjatadis. (A.I.) – 07.09.2022