Trê monedis di aur a son stadis cjatadis inte aree dal ex Fondo Pasqualis, inte part plui sudorientâl di Aquilee dilunc di une campagne di sgjâfs fate di une scuadre de Universitât di Verone, Dipartiment di Culture e civiltât, sot de direzion di Patrizia Basso in colaborazion cun Diana Dobreva.
Lis trê monedis, cugnadis sot dai imperadôrs Valente, Magno Massimo e Arcadio, a son de fin dal secul IV dopo di Crist. A podaressin jessi regâi dal imperadôr a cualchi personaç de sô cort e a son stadis cjatadis sot dal paviment dal puarti di un dai edificis dal marcjât, forsit platadis intun moment di pericul grant. I sgjâfs a son ladis indenant par trê mês, a àn cjapât dentri plui di 20 tra students e ricercjadôrs dal ateneu veronês e di altris universitâts talianis e forestis, e a àn permetût di controlâ passe 800 metris cuadris di teren mai sgjavât prime. (a.d.g.) – 12.11.2025
