Trê forescj, tra i 25 e i 33 agns, a son stâts arestâts a Udin dal Nucli investigatîf dai Carabinîrs par detenzion di droghis. La operazion e je scomençade vuê di buinore intal borc de stazion, te zone di vie Leopardi. Dongje al zardin “Giovanni Pascoli”, i agjents a àn osservât un compuartament suspiet di trê personis e a àn fat dai controi.
Intor dai trê a àn cjatât 760 euros in contants e dongje, platâts jenfri i plets, a son stâts cjatâts pacuts cun dentri in dut 70 grams di hashish e 2 grams di mariuane.
I trê citadins extra comunitaris a son stâts puartâts inte preson di Udin a disposizion dai judiçs; lis droghis e i bêçs, che a si pense a sedin stâts vuadagnâts cul trafic di droghe invezit, a son stâts confiscâts. (a.d.g.) – 15.01.2026
