Tornât in vore l’orloi des stelis

L’orloi des stelis al è tornât al so puest tal foyer dal teatri “Giovanni da Udine”. L’imprest, che al è di proprietât dal Comun, al jere stât pensât 25 agns indaûr dal designer Fabio Di Bartolomei, cul mecanisim progjetât dal architet Michelangelo Castellarin. A fâlu e jere stade la dite Solari di Pesariis adun cu la Neon Arco di Udin. Al misure il timp che al covente ae Tiere par fâ un zîr rispiet a lis stelis. Chê volte a jerin stâts fats doi orlois, chel altri si cjate tal Osservatori astronomic di Praghe. Passât il timp, al orloi restât in Friûl i coventave une comedade e cussì al è stât fat. Cuant che al è stât tornât a meti tal so puest, a jerin presints sedi i siei doi paris, Di Bartolomei e Castellarin, sedi i tecnics des aziendis che lu àn fat, adun cul assessôr comunâl ae Culture Federico Pirone, che al à vût a grât pe opare che al è un esempli de bravure furlane sedi pal design sedi pe tecniche. (R.C.) – 16.04.2025