I carabinîrs de stazion di Felet a àn svantade une fraude telefoniche. Cheste matine, un resident di 68 agns al à ricevût un messaç di test sul so telefonin, mandât al someave di une bancje une vore cognossude, che lu informave di une autorizazion di paiament di 1.570 euros dal so cont, adun cuntune domande di clamâ un specific numar di telefonin par blocâ il trasferiment.
L’om al à contatât il numar indulà che i à rispuindût un om che si è identificât tant che sot uficiâl dai carabinîrs. Il fals militâr lu visave di une investigazion in cors suntune schirie di transazions bancjaris suspietis, insistint che la vitime e las in bancje par fâ trasferiments suntun cont specific.
Pôc dopo, l’om al à cjapât une altre telefonade che il telefon al mostrave il numar dal Comant Provinciâl dai carabinîrs di Udin. Inte comunicazion, il fals uficiâl al à dât istruzions par fâ il trasferiment bancjari, che la vitime e à fat daurman in linie par un totâl di 39.905 euros.
Daspò a son rivadis gnovis clamadis, simpri par domandâ che la vitime e fasès ancjemò paiaments che però a àn stiçât i suspiets dal om, che al è lât daurman dai carabinîrs di Felet, dulà che a àn scuviert in pôc timp che e jere une trufe e a àn inviade la procedure par blocâ la transazion, rivant cussì a “inglaçâ” la transazion e impedî che e fos increditade sul cont dal fraudadôr.
Cumò i militârs a stan fasint lis investigazions par identificâ il trufadôr. I carabinîrs a àn sotlineât che nissune fuarce dal ordin o bancje e pues domandâ il trasferiment di bêçs e a àn ricuardât che par cualsisei segnalazion o suspiet, la int e pues contatâ la sede provinciâl dai carabinîrs di Udin o telefonâ al numar di emergjence 112. (a.d.g.) – 27.01.2026
